Anne-Sophie Palmer

 

   Wo kummst Du her?

Opwussen bün ik tosamen mit mien fief Bröder op’n Buernhoff in en lütt Dörp in Holsteen, so twüschen Lübeck un Sebarg (Bad Segeberg).

   Woans is dat bi Di anfungen mit’n Schrieven? Un worüm op Platt?

Kann ik gor nich mol so seggen. Toerst hett mien Mann dormit anfungen un irgendwann füllen mi ok so Begevenheiten in, de ik gern mal vertellen wull. Un wiel dat vele Beleevnisse ut mien Kinnerjohren un ut uns Dörp weren, güng dat gor nich anners as op Platt. Ik bün ja mit Platt upwussen (harr likers kene Schwierigkeiten mit dat Hochdüütsche in de School, so as dat jümmer vörutseggt ward) un bet hütigen Dags gifft dat Lüüd, wo ik gor nich anners as Platt mit snacken kann. Un wenn ik mal blots wat mit Plattdüütsch dacht heff, fallt mi dat binah swor, dat op Hochdüütsch uttospreken.


Wat hest Du anners in Dien Leven maakt?

Wat hest Du noch so vör?

Na de School un de Utbildung in „Ländliche Hauswirtschaft“ heff ik mit 19 Johr, 1954, heirat. Tosamen hefft wi veer Johr en lütte Siedlung bewirtschaft. Un denn füng mien Mann mit 31 Johr noch an to studieren, he weer ja sowat wie „kriegsgeschädigt“, mit Notabitur usw. Bald harrn wi söss Kinner, sünd, as mien Mann sien theologisch Examen afleggt harr, veel umhertrocken. So „richtig arbeit" heff ik nich, har mit de Kinner un Huus un meist ok groten Gorn un, as man dat nöömt, „ehrenamtliche Tätigkeit“ naug üm de Ohren. Binah 52 Johr kunn ik tosamen mit mien Mann leven. All mehr as acht Johr bün ik nu alleen. Middewiel is de Famili aver düchtig grötter worn. Ik frei mi över 14 Enkel un veer Urenkel. Dor gifft dat jümmer heel veel to bedenken, to besöken un Besöök to hebben. Dat is gor nich so licht, de Kinner sünd all wiet verstreut, bet na Kanada. Dor gifft dat ne Masse to reisen.


Wo bliffst Du mit Dien Texten af?

Mien plattdüütsche Texten sünd för de LZ in „Wi snackt Platt“ dacht.


Woans kann een Di tofaatkriegen?

Tofaten kriegen könnt ji mi so:

Anne-Sophie Palmer

Ludwig-Beck-Straße 43

21337 Lüneburg

Tel. 0 41 31 – 82 42 2

E-Mail: anne-sophie.palmer@gmx.de