Christine Marquardt

 

Wo kummst du her?

Ik wahn in Amekhusen.

 

Woans is dat bi di mit’t Schrieven anfungen?

2019 heff ik anfungen, lütte, plattdüütsche Texte för de plattdüütschen Kinnernarichten, de all veerteihn Daag in de LZ druckt warrt, to schrieven. Later kemen ok längere Texte för de Rubrik „Wi snackt Platt, de sünnavends in de LZ druckt warrt, dortau.

Ik harr so vele Ideen, dat ik miene Geschichten in twee Böker tosamenfaat heff.

Ik schriev jümmer noch geern un veel un villicht kummt dor ja noch en drüttet Book bi ruut.

Dortau kummt, dat ik dat Lektorat för de plattdüütschen Geschichten, de in de Lanneszeitung druckt warrt, övernahmen heff.

 

Wat hest du anners in dien Leven maakt? Wat hest du noch so vör?

Ik heff na de teihnte Klass op’t Gymnasium ene Utbillen to PTA (pharmazeutisch-technische Assistentin) maakt. Ik heff al in unnerscheedliche Aptheken arbeidt. In’n Momang arbeidt ik in Amekhusen.

2018 heff ik heiradt.

Wat ik noch so vör heff? Ik kiek eenfach, wat de Tiet so bringt.

 

 

Wo bliffst du mit dien Texten af?

De korten Sachtexte warrt op de Kinnersiet vun de Lanneszeitung druckt. De langen Texte warrt af un to in de Lanneszeitung in de Rubrik „Wi snackt Platt“ druckt. En poor Geschichten kaamt ok in’t Quadrat.

Wenn ik noog Geschichten tosamen heff, faat ik jem to en Book tosamen.

Mien Book „Plattdüütsch vun hüüt för morrn“ warrt bi Plattschapp & Plaggenhauer, bi Lünebuch un in de Bücherstube Krüger in Amekhusen verköfft.

Mien Book „Plattdüütsch för jedereen“ gifft dat bi Plattschapp & Plaggenhauer.

 

Woans kann een di faatkriegen?

An’n Besten kann een mi ene Email an Christine.Imort@web.de schrieven.

Ik anter ok fix.