Ekhard Ninnemann

 

Wo kummst Du her?

Ik kumm ut Nordfreesland, Medelby, Dörp nahbi de däänsche Grenz. Dor bün ik boorn un groot worrn . Dor gääv dat Lüüd, de snacken Hochdüütsch oder Däänsch, avers de mehrsten noch Platt, as ik lütt weer. Platt weer ok de Spraak vun miene Öllern ünner sik un vun de bannig netten Buurnslüüd, wo wi as Flüchtlinge vun 1945 bit 1951 ünnerbröcht weern.  Siet 1976 leev ik nu in Lümborg.


Woans is dat bi Di anfungen mit’n Schrieven?

Mit dat Schrieven heff ik dat kregen in miene Schoolmestertiet. Dor heff ik bi den Klett-Verlag Böker för den Engelschünnerricht (mit)schreven. Achteran denn veele Böker för den Düütschünnerricht,  Klassen 5 bit 10 as Autor un Ruutgever bi den Cornelsen Verlag in Berlin. So 2005 harr ik  dor de Idee för en Uutgaav Nord vun uns Düütschbook, wo  Plattdüütsch ok en wichtig Rull spelen schull. Un de Verlag hett mitmaakt. Dat hett mi freit,  un ik heff  bi düsse Arbeit veel  mitkregen, wat dat so allens an plattdüütsche Literatur gifft. Ik kunn so mien Kindheitsspraak werrer för mi  un ok för de Schoolböker op den Weg bringen. – Blots,  anner Lüüd motiveern un wat lehrn is doch  anners wat, as sülven  Gedichten, Vertelln oder Böker schrieven.  Mien eerst  Manuskript an en Verlag, dat is man blots  fief Johr her.  As  dat denn annohmen wöör,  dor heff ik mi mehr freit as bi all de Schoolböker.


Un worüm op Platt?

Anfungen is dat 2005 mit miene Gedichten över dat Solt un de Sulteknechte in Lümborg,  wat denn 2013 ruutkamen is. Stück för Stück harr ik rechercheert, schreven, sammelt un överarbeidt, bet dor en helen Gedichtzyklus vun worrn is. Worüm op Platt? Wieldatt dat passen dä, wenn een över de Sulteknechte in Lümborg schrifft. Denn dat Plattdüütsche weer de Sulteknechte ehr Spraak in ’t Middelöller. Vergeten Lüüd, vergeten Spraak.  Schöön weer, datt ik denn so en bannig goden  Graphiker as Volker Butenschön  för dat Gedichtbook funnen heff un as Verlagsbaas Christian von Stern, de hüüt ok een vun uns Maten bi Lüneplatt is.


To diene Böker:

    Bi mien eerst Billerbook 2008 weer dat anners mit dat                       Plattdüütsche. Kuno un Penelope harr ik toeerst op Hochdüütsch         schreven, avers dat funn  ik op Hochdüütsch nich goot, veel  too         stief un stakig.  So heff ik dat op Platt versöcht. Un dat wöör en           Masse lebendiger,  enfach vun de Spraak her.  Dat  geev denn noch     en anner Grund: To de Tiet, 2008, geev dat kuum Billerböker op         Platt. Un wenn een an de Tokunft denkt, denn mutt een Platt ünner     de Kinner un ehr Öllern bringen,  harr ik dacht.  As Pädagoge mutt     een wull so denken. - In de letzten fief Johr sünd nu al bannig vele     Biller- un Kinnerböker op Platt ruutkamen. Dat freit mi, datt ik dor     nu ok op miene Wies wat tostüert heff, tosamen mit Sabi Heumann     ut Vagelsen.  Denn se hett de wunnerbooren Biller maalt.


    „Trüffel un Rosalie“  und „Dat is Platt“: Bi düsse twee Böker  hett         mi dat Översetten Spaaß maakt – alleen bi dat eerste, un tosamen     mit mienen Fründ Günther Wagener bi dat twete Book.


    Jo, un denn is dor noch „Krömel un sien kakelbunten Goorn“, de         Geschicht vun en Bangbüx, de doch bannig kurageert ward un sik       op de Padden  maakt vun sien leddig to en kakelbunten Goorn. Un       achteran geiht he ruut in de grote Welt. En Malgeschicht för               Kinners. Dat heff ik 2010 för den Schünemann-Verlag schreven.



 

Wat hest Du noch so vör mit Plattdüütsch?


    Anner Ideen töövt noch in mien Schapp. De töövt op den Momang,     wo mi dat packen deit.  Suutje, suutje geiht dat, bün jo ok nich         mehr fofftein. –  Dorto höört, datt ik Spaaß heff , anner Lüüd dat       Schrieven vun Billerböker un överhaupt bitobögen.  Dat maak ik         düt Johr werrer an uns  Uni tosamen mit Fru Heumann in en               Seminar „Billerböker interkulturell“.Noch en poor Billerböker op den     Weg bringen. In ‘n Harvst 2014 is en Book för lütte un grote Lüüd       rutkamen –  werrer bi Schünemann  –  vun Karolin,  en Lokomotiv,     de afsluuts keen Lust mehr hett op de Schenen un denn ehr               Freeheit söcht.  Heten schall dat „Suutje suutje“.  Un werrer is dat       Sabi Heumann, de ganz inföhlsam tekent un maalt hett.


Woans kann een Di tofaatkriegen?

 

Woans een mi tofaat kriggt?  ninnemann@leuphana.de  ode Tel. 04131/402916.

Un Fru Heumann för de Graphik: sabi.heumann@gmail.com  ode Tel 04131/6003189