Rolf Kliemann

 

   Wo kummst Du her?

Upwussen bün ik in Lümborg. Miene Öllern sünd veel ümtrocken, also heff ik binah jedeen Stadtdeel kinnenlihrt.

 

   Woans is dat bi Di anfungen mit’n Schrieven? Un worüm op Platt?

Platt heff ik bi de Buern in Oehm (Oedeme) lihrt. Aver mien Vadder hett mi faken wat vun Rudolf Kinau vörleest.

Mit Platt schrieven is dat bi mi so anfungen: Helmuth Möhring hett bi de AWO ‘n Plattsnackerkring grünnt un mi dorto inlaadt. Dat weer 1999. Bit dorhen harr ik noch keen eenzig Woort Platt schreven. Aver Helmuth sä: „Dat kannst du ok!“ Un so heff ik mien eerste Geschicht över „Millenjum“ un den vörherseggten Computercrash schreven. De Crash is denn ja heel utfullen – blot in mien Rekner weer allens in’n Dutt.

Dat Schrieven is denn so wiedergahn, derwiel mi dat Spaaß maakt hett. Wenn mi hüüt ener seggt: „Schriev doch mal wat op Hoochdütsch!“, denn anter ik: „Also, wat mi infallt, dat kann ik beter op Platt utdrücken. Dat hett mehr Saft un Kraft.“

 

Wat hest Du anners in Dien Leven maakt? Wat hest Du noch so vör?

Den Krieg heff ik af 1941 an all Fronten mitmaakt un kann mi hüüt blot noch wunnern, dat wi up den GRÖFAZ rinfullen sünd. Na’n Krieg heff il eerstmal Discher lihrt. Egentlich wull ik Architekt warrn, aver dat hett nich klappt. Ik weer denn dörtig Johr bi’n Grenzschutz un bi’n Bund. Dorna heff ik’n Book för de Familie schreven: „Teihnmal ümtrocken“.

As Rentner heff ik noch’n ganzen Barg Heimatgeschichten schreven, de natürlich op Hochdüütsch. Dat letzte Wark heet „Salzschiffe für die Stadt Lüneburg“.

Wat ik noch so vörheff? Na, wenn een negentig Johr old is, kann dat so veel nich ween. Ik will noch möglichst veel schrieen, aver wenn ik mark, mi fallt nix Plietsches mehr in un mit de Lektorenupgaav löppt dat nich mehr so richtig, denn bruuk ik as Lektor ‘n Nafolger! Dor schall sik al mal een op instellen.

 

Wo bliffst Du mit Dien Texten af?

Ünner de Regie vun Helmuth Möhring keem dat dorto, dat se Platt-Schrievers ehre Döntjes in’e LZ afdrucken kunnen. Helmuth hett dat organiseert un stüert. As he mark, dat sien Tiet aflopen dä, hett he mi düt Geschäft överdragen. Ik wull dat aver nich blot stüern, ik wull ok för ‘ne „mediengerechte“ Schrievwies sorgen. Mit de plattdüütschen Rechtschrievregeln na Sass harr ik mi intwüschen vertroot maakt. De annern Schrievers hebbt sik dor an wennt. Dat is doch so: Wenn wi all in’e sülve Rubrik schrievt, denn geiht dat nich, dat wi de sülven Wöör jede Week anners schrievt.

2005 bün ik denn bi’n Vertell-Wettstriet vun’n NDR in dat „Wat’n Malöör“-Book rinkamen. In’e Twüschentiet kemen mi de Themen nich so topass. Aver düt Johr bün ik ok wedder in dat Book („Spele“). Vun mien Geschichten sünd so wat sösstig Stück in’e LZ afdruckt wurrn.

 

 Woans kann een Di tofaatkriegen?

Rolf Kliemann

Einemhöfer Weg 14

21394 Kirchgellersen

Tel. 0 41 35 / 427

rolf.kliemann@arcor.de