Johann Leupold

 

Wo kummst Du her?

Wahnen do ik in Wendisch Evern. Boorn bün ik aber nich wiet af von Hannober un ik bün een mit ‘n Migratschoons-Achtergrund. Mien Opa is nämlich ‘n fränkischen Utwannerer ween un de het ok mienen snakschen Naam mibröcht. Upwossen bün ik mit dat Calenbarger Platt – dat is dat, wat ok Wilhelm Busch bruukt hett. Platt snacken heff ik nie lehrt un wenn ik et lehrt heff, denn weer dat ok „küren” un nich snacken.


Woans is dat bi Di anfungen mit’n Schrieven?

Schreven heff ik all jümmers veel un de düütsche Spraak hett mi all jümmers interesseert. Dat hett woll da an legen, dat mien Düütschlehrer mi dat nich totruut hett.


Un worüm op Platt?

To dat Plattschrieven bün ik denn öber de Platt-Rubrik in de LZ kamen. Ik harr dacht, dat dat viellicht mööglich ween kunn, dör Artikels, de de Lüüd geern leest, wat för dat „Kulturgut nedderdüütsche Spraak” to doon. Daför heff ik denn ok dat Platt-Wiki in‘t Internet bi ZUM.de in Gang bröcht. Da köönt Schoolmesters Hülp finnen un Hülp anbeden. Dat Schrieven hett mi denn to Sass bröcht. Dat is Johannes Sass, de versöcht hett, dat plattdüütsche Rechtschrieven so to maken, dat dat Lüüd in ganz Norddüütschland goot verstahn künnt. Ik denk nämlich, dat dat keen gode Idee is, wenn jedeen sien egen Tungenslag ok up dat Papeer seihn mutt.


Wo bliffst Du mit Dien Texten af?

Ik heff veel Böker maakt – dat weern aber gröttstendeels Schoolböker. Denn heff ik aber ok ‘n poor von de plattdüütschen Geschichten ut de Lanneszeitung to‘n Book tosamenfaat.


Woans kann een Di tofaatkriegen?

Keen mi anropen will, kann mi in dat Telefoonbook ünner Wendisch Evern finnen un keen mi ‘ne E-Mail schrieven will, de find miene Adress ünner www.21403-wendisch-evern.de. För „sozial Nettwarkeri“ bün ik nich plietsch naug!